ചികിത്സാപ്പിഴവെന്ന് ആരോപണം… കുന്നംകുളം മലങ്കര ആശുപത്രിയിൽ മൂന്നര വയസ്സുകാരൻ മരിച്ചു

കുന്നംകുളം: മലങ്കര ആശുപത്രിയിൽ ചികിത്സയ്ക്കിടെ മൂന്നര വയസ്സുകാരൻ മരിച്ചു. തൃശൂർ മുണ്ടൂർ സ്വദേശി പാറമേൽ വീട്ടിൽ മൂന്നര വയസ്സുള്ള ആരോൺ ആണ് മരിച്ചത്. പല്ലുവേദനയുമായി ബന്ധപ്പെട്ടാണ് കുട്ടിയെ ആശുപത്രിയിൽ പ്രവേശിപ്പിച്ചത്. ചികിത്സ പിഴവാണ് മരണ കാരണമെന്നാരോപിച്ചുകൊണ്ട് ബന്ധുക്കൾ രംഗത്തെത്തി. ഇന്നലെ വൈകിട്ട് 4 മണിയോടെയാണ് കുട്ടിയെ ചികിത്സയ്ക്കായി മലങ്കര ആശുപത്രിയിൽ പ്രവേശിപ്പിച്ചത്. തുടർന്ന് ഇന്ന് രാവിലെ 6 മണിയോടെ സർജറിക്കായി റൂമിൽ നിന്ന് കൊണ്ടുപോയി. തുടർന്ന് പതിനൊന്നരയോടെ ബന്ധുക്കൾ കുട്ടിയെ കാണണമെന്ന് ആവശ്യപ്പെട്ടെങ്കിലും ആശുപത്രി അധികൃതർ അനുവദിക്കാത്തതിനെ തുടർന്ന് സംശയം തോന്നിയ ബന്ധുക്കൾ വാതിൽ തള്ളിത്തുടർന്ന് റൂമിനുള്ളിലേക്ക് കയറിയപ്പോഴാണ് കുട്ടിക്ക് ആശുപത്രി അധികൃതർ അടിയന്തര ചികിത്സ നൽകുന്നത് കണ്ടതെന്ന് ബന്ധുക്കൾ പറഞ്ഞു.