വടക്കേക്കാട് മണികണ്ഠേശ്വരത്ത് മാരകായുധങ്ങളുമായിത്തിയ സംഘം യുവാക്കളെ ആക്രമിച്ചു

വടക്കേക്കാട്:മണികണ്ഠേശ്വരത്ത് മാരകായുധങ്ങളുമായി എത്തിയ സംഘം യുവാക്കളെ ആക്രമിച്ചു. വടക്കേക്കാട് കല്ലൂർ സ്വദേശികളായ മഠപ്പാട്ടുപറമ്പിൽ  കിഷോർ(27), അഴിയത്ത് അഫാസ്(26), കണ്ടമ്പുള്ളി അക്ഷയ് (23) എന്നിവർക്കാണ് പരിക്കേറ്റത്. തിങ്കളാഴ്ച രാത്രിയെ 12 മണിയോടെയായിരുന്നു സംഭവം. വടക്കേക്കാട് നിന്നും നാലാംകല്ലിലേക്ക്  ഭക്ഷണം കഴിക്കാൻ പോകുന്നതിനിടെ  മണികണ്ഠേശ്വരത്തെ ഇട റോഡിൽ നിന്നും യുവാക്കൾ സഞ്ചരിച്ച ബൈക്കിനെ പിന്തുടർന്നെത്തിയ സംഘം യുവാക്കളെ ആക്രമിക്കുകയായിരുന്നുവെന്ന് പറയുന്നു.കാറിലും ബൈക്കിലുമായെത്തിയ പതിനഞ്ചോളം വരുന്ന സംഘമാണ് തങ്ങളെ ആക്രമിച്ചതെന്ന് യുവാക്കൾ പറഞ്ഞു. വടിവാൾ, ഇടിക്കട്ട തുടങ്ങിയ മാരകായുധങ്ങൾ ഉപയോഗിച്ചാണ് യുവാക്കളെ സംഘം ആക്രമിച്ചത്. വാൾ കൊണ്ടുള്ള വീശലിൽ യുവാക്കളിൽ ഒരാൾക്ക് തലയ്ക്ക് പരിക്കേറ്റിട്ടുണ്ട്. വാളിന്റെ പിടി ഉപയോഗിച്ച്  തലയ്ക്ക് അടിച്ചതായും ഇടികട്ട കൊണ്ട് നെഞ്ചിലേക്ക് ഇടിച്ചതായും പറയുന്നു. യുവാക്കളെ ആക്രമിച്ച സംഘം സമീപത്തെ തോട്ടിലും ഒഴിഞ്ഞ പറമ്പിലും യുവാക്കളെ ഉപേക്ഷിച്ചതിനുശേഷം കടന്നുകളഞ്ഞു.പരിക്കേറ്റവരെ ജോൺസൺ ചാരിറ്റബിൾ ട്രസ്റ്റ് ആംബുലൻസ് പ്രവർത്തകർ ആദ്യം കുന്നംകുളം താലൂക്ക് ആശുപത്രിയിലും പരിക്ക് ഗുരുതരമായതിനെ തുടർന്ന് തൃശ്ശൂർ മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. സംഭവത്തിൽ വടക്കേക്കാട്  പോലീസ് കേസെടുത്ത് അന്വേഷണം ആരംഭിച്ചു.