ബജറ്റ് :ഗുരുവായൂരിന് പുതുതായി ഒന്നും അനുവദിച്ചില്ല – എൻ കെ അക്ബർ എംഎൽഎ

ചാവക്കാട് :പുതുക്കിയ 2026-27 സംസ്ഥാന ബജറ്റില്‍ ഗുരുവായൂർ മണ്ഡലത്തിന് കഴിഞ്ഞ ബജറ്റില്‍ അനുവദിച്ച 10 കോടി രൂപയുടെ വകയിരുത്തലുകള്‍. ഗുരുവായൂർ ആയുർവേദ ആശുപത്രി 2 കോടി രൂപ, ചക്കംകണ്ടം സ്ലൂയിസ് കം ബ്രിഡ്ജ് 2 കോടി, ഏങ്ങണ്ടിയൂർ കോട്ടക്കടപ്പുറം സ്കൂൾ ഗ്രൗണ്ട് വികസനം 1 കോടി, ചാവക്കാട് പൊതുമരാമത്ത്  റെസ്റ്റ് ഹൗസ് പുതിയ കെട്ടിടം 2 കോടി, മുനക്കകടവ് ഫിഷ് ലാൻഡിങ് സെൻ്റർ വികസനം (സ്ഥലമെടുപ്പ് ഉൾപ്പെടെ) 2 കോടി , ജി യുപി സ്ക്കൂൾ വടക്കേക്കാട് പുതിയ കെട്ടിടം 1 കോടി എന്നീ പദ്ധതികളാണ് പുതുക്കിയ ബജറ്റിലും ഇടം പിടിച്ചത്. കഴിഞ്ഞ ബജറ്റിൽ ഉൾപ്പെടുത്തിയിരുന്ന കോട്ടപ്പടി – തമ്പുരാൻപടി – അഞ്ഞൂർ ( 2 കോടി ) റോഡ് ബിഎംബിസി പുതുക്കിയ ബജറ്റിൽ വന്നിട്ടില്ല. കൂടാതെ മമ്മിയൂർ ഫ്ലൈ ഓവർ നിർമാണതിന്നും കടപ്പുറം കടൽഭിത്തി നിർമാണത്തിനും ബജറ്റിൽ തുക അനുവദിക്കുന്ന വിഷയം വകുപ്പ് മന്ത്രി മാരെയും മുഖ്യ മന്ത്രിയെയും നേരിൽ കണ്ട് ആവശ്യപ്പെട്ടിരുന്നതാണ് . ബജറ്റിൽ തുക അനുവദിക്കാത്തത് ബജറ്റ് പ്രസംഗത്തിന് ശേഷം മുഖ്യമന്ത്രിയുടെ ശ്രദ്ധയിൽ പെടുത്തിയെന്നും ഗുരുവായൂർ എംഎൽഎ എൻ കെ  അക്ബർ അറിയിച്ചു. കഴിഞ്ഞ ബജറ്റിൽ മുൻ ധനമന്ത്രി ബാലഗോപാൽ അനുവദിച്ച പദ്ധതികൾ മാത്രമാണ് അനുവദിച്ചതെന്നും ഗുരുവായൂരിന് പുതിയതായി ഒന്നും അനുവദിച്ചില്ലെന്നും എംഎൽഎ കൂട്ടിച്ചേർത്തു