ചാവക്കാട് സ്വദേശിയെ ഇരുമ്പ് പൈപ്പ് കൊണ്ടടിച്ച് കൊലപ്പെടുത്താൻ ശ്രമം

ചാവക്കാട്:ചാവക്കാട് സ്വദേശിയെ ചൂണ്ടൽ കൂനംമൂച്ചിയിൽ വെച്ച് ഇരുമ്പ് പൈപ്പ് കൊണ്ടടിച്ച് കൊലപ്പെടുത്താൻ ശ്രമം.കഴുത്തിന് സാരമായി പരുക്കേറ്റ ചാവക്കാട് മണത്തല പുളിച്ചിറക്കെട്ട് കെ.വി.അലിക്കുട്ടി(55)യെ കുന്നംകുളം സ്വകാര്യ ആശുപത്രിയിൽ പ്രവേശിപ്പിച്ചു.ഇരുമ്പു പൈപ്പ് കൊണ്ടുള്ള അടിയേറ്റാണ് കഴുത്തിന് പരുക്കേറ്റത്.മണത്തല ജുമാ അത്ത് പള്ളി കമ്മിറ്റിയിൽ നിയമങ്ങൾ മറികടന്ന് ഒരാൾ അംഗമായി വരുന്നതിനെ എതിർത്തതാണ് ആക്രമണത്തിന് കാരണമെന്ന് അലിക്കുട്ടി പറഞ്ഞു. മോട്ടോർ വാഹന ടെസ്റ്റിന് ചൂണ്ടൽ ഡ്രൈവിംഗ് ഗ്രൗണ്ടിൽ എത്തിയ അലിക്കുട്ടിക്ക് നേരെ ഇന്നലെയാണ് ആക്രമണം ഉണ്ടായത്.പോലീസ് കേസെടുത്ത് അന്വേഷണം ആരംഭിച്ചു.