ഫോറസ്റ്റ് ഉദ്യോഗസ്ഥൻ ചമഞ്ഞ് ജോലി വാഗ്ദാനം ചെയ്ത് ലക്ഷങ്ങൾ തട്ടിയ പ്രതി പിടിയിൽ

കുന്നംകുളം: ഫോറസ്റ്റ് ഉദ്യോഗസ്ഥൻ ചമഞ്ഞ് ജോലി വാഗ്ദാനം ചെയ്ത് നിരവധി ആളുകൾ നിന്ന് ലക്ഷങ്ങൾ തട്ടിയ പ്രതിയെ കുന്നംകുളം പോലീസ് അറസ്റ്റ് ചെയ്തു. പറപ്പൂർ എടക്കളത്തൂർ സ്വദേശി കിഴക്കുമുറി വീട്ടിൽ പ്രബിൻ(34)നെയാണ് കുന്നംകുളം സ്റ്റേഷൻ ഹൗസ് ഓഫീസർ യുകെ ഷാജഹാന്റെ നിർദ്ദേശപ്രകാരം പ്രിൻസിപ്പൽ സബ് ഇൻസ്പെക്ടർ മഹേഷിന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. ബിരുദധാരികളായ ആളുകളെ കബളിപ്പിച്ച് മൃഗശാലകൾ, എയർപോർട്ട് എന്നിവിടങ്ങളിൽ ജോലി വാഗ്ദാനം ചെയ്താണ് പ്രതി പലരിൽ നിന്നായി ലക്ഷങ്ങൾ തട്ടിയത്. ഫോറസ്റ്റ് ഉദ്യോഗസ്ഥന്റെ യൂണിഫോം ധരിച്ച് പ്രതി കബളിപ്പിക്കപ്പെട്ടവരെ വീഡിയോ കോൾ ചെയ്താണ് താൻ ഫോറസ്റ്റ് ഉദ്യോഗസ്ഥനാണെന്ന് വിശ്വസിപ്പിച്ചിരുന്നത്.പത്താം ക്ലാസ് തോറ്റതിനെ തുടർന്ന് പഠനം നിർത്തി പ്രതി കൽപ്പണി ജോലി ചെയ്തിരുന്നു.പലരിൽ നിന്നായി തട്ടിച്ച പൈസ ആർഭാട ജീവിതത്തിനായി ഉപയോഗിച്ചതായി പോലീസ് പറഞ്ഞു.ഇയാൾ വ്യാജരേഖകൾ നിർമ്മിച്ചതായും പോലീസ് കണ്ടെത്തിയിട്ടുണ്ട്.