ശബരിമലതീർത്ഥാടനം;ഗുരുവായൂരിൽ ദർശന സൗകര്യം

ഗുരുവായൂർ:മണ്ഡല തീർത്ഥാടന കാലത്തിന് തുടക്കം കുറിച്ച് നാളെ വൃശ്ചികം ഒന്ന് മുതൽ അയ്യപ്പഭക്തർക്ക് പ്രത്യേക ദർശന സൗകര്യത്തിനായി വരിസംവിധാനം ഒരുക്കും. മണ്ഡല കാലം പ്രമാണിച്ച് ക്ഷേത്രം നട ഒരു മണിക്കൂർ നേരത്തെ തുറക്കും. ഉച്ചതിരിഞ്ഞ് ഇനി തീർത്ഥാടന കാലം കഴിയുന്നതുവരെ ക്ഷേത്രം നട വൈകിട്ട് 3.30ന് തുറക്കും. കൂടുതൽ ഭക്തർക്ക് ദർശനം ഒരുക്കുന്നതിനാണ് ഈ നടപടി.വിരിവെക്കാൻ തീർത്ഥാടകർക്ക് വടക്കേ പന്തൽ ഭാഗത്ത് സൗകര്യം ഉണ്ടാകും. കെട്ടുനിറക്കാനുള്ള ദേവസ്വം സ്റ്റാൾ പടിഞ്ഞാറെ നടയിൽ പ്രവർത്തന സജ്ജമായി.മിതമായ നിരക്കിൽ കെട്ടുനിറ സാധനങ്ങൾ ഇവിടെ ലഭ്യമാണ്. ഹരിത ചട്ടം പാലിച്ചാകും ഇത്തവണ ശബരിമല തീർത്ഥാടനത്തെ വരവേൽക്കുന്നത്.ഗുരുവായൂരിലുള്ള ദേവസ്വം വക പാർക്കിങ്ങ് ഗ്രൗണ്ടുകൾ സജ്ജമാക്കി. മതിയായ വെളിച്ചവും ഉറപ്പുവരുത്തി. ക്ഷേത്രപരിസരത്തെ വഴിയോര കച്ചവടം ഒഴിവാക്കാൻ പോലീസുമായി ബന്ധപ്പെട്ട് നടപടി സ്വീകരിക്കുo. ക്ലോക്ക് റൂം, ചെരുപ്പ് കൗണ്ടർ തുടങ്ങിയവയിൽ കൂടുതൽ നിരക്ക് വാങ്ങിയാൽ പോലീസിനെ അറിയിച്ച് കർശന നടപടിയെടുക്കാനും ദേവസ്വം തീരുമാനിച്ചിട്ടുണ്ട്. സത്രം മുതൽ ഗോകുലം ഹോട്ടൽ വരെയും കിഴക്കേ നട റോഡ് മുതൽ വാഹന പാർക്കിങ്ങ് സമുച്ചയം വരെയുള്ള ഭാഗത്ത് വാഹന പാർക്കിങ്ങ് അനുവദിക്കില്ല. വാഹന പാർക്കിങ്ങ് സമുച്ചയത്തിന് തെക്കുഭാഗത്ത് ഇരുചക്രവാഹനങ്ങൾക്ക് പാർക്കിങ്ങ് അനുവദിക്കും.