അനധികൃത മണ്ണ് കടത്ത്; ടിപ്പർ ലോറിയും ഡ്രൈവറും പിടിയിൽ

കുന്നംകുളം:അനധികൃതമായി മണ്ണ് കടത്തിയ സംഭവത്തിൽ ടിപ്പർ ലോറി യേയും ഡ്രൈവറേയും കുന്നംകുളം പോലീസ് പിടികൂടി. ലോറി ഡ്രൈവർ കാണിപ്പയ്യൂർ സ്വദേശി സൂരജിനെയാണ് പോലീസ് പിടിച്ചത്. ചെറുപ്പുളശ്ശേരിയിൽ നിന്നും അനുമതിയില്ലാതെ കുന്നംകുളം ഭാഗത്തേക്ക് മണ്ണ് കടത്തുന്നുണ്ടെന്ന് പോലീസിന്റെ രഹസ്യന്വേഷണ വിഭാഗത്തിന് ലഭിച്ച രഹസ്യ വിവരം ലഭിച്ചിരുന്നു.ഇതിൻ്റെ അടിസ്ഥാനത്തിൽ കുന്നംകുളം സ്റ്റേഷൻ ഹൗസ് ഓഫീസർ യുകെ ഷാജഹാന്റെ നിർദ്ദേശപ്രകാരം സബ് ഇൻസ്പെക്ടർ ജ്യോതിസ്, എഎസ്ഐ സജയ് എന്നിവരുടെ നേതൃത്വത്തിൽ കുന്നംകുളം കക്കാട് മേഖലയിൽ വാഹന പരിശോധന നടത്തുന്നതിനിടെയാണ് ലോറി പിടികൂടിയത്. പിടികൂടിയ വാഹനം ജിയോളജി വകുപ്പിന് കൈമാറുന്നതിനാവശ്യമായ നടപടികൾ സ്വീകരിച്ചു. അനധികൃത മണ്ണ് കടത്ത് തടയുന്നതിന്റെ ഭാഗമായി മേഖലയിൽ വരും ദിവസങ്ങളിലും പരിശോധന ശക്തമാക്കുമെന്ന് പോലീസ് അറിയിച്ചു.